Cyngor ar Gerdded Iachus

Cerdded twyllodrus!

Mae'n hawdd twyllo eich hunan i fynd am dro. Rhowch gynnig ar y syniadau yma:

• Cerddwch y plant i'r ysgol.
• Dewch oddi ar y bws wrth arhosfan bellach.
• Defnyddiwch y grisiau yn lle'r lifft.
• Cynigiwch fynd â chi rhywun am dro.
• Os ydych chi'n gyrru i rywle sy'n llai na milltir i ffwrdd, cerddwch yn lle.
• Cuddiwch declyn rheoli'r teledu.
• Ewch i ymweld â'ch man gwyrdd lleol.

Meddyliwch am y peth!

Os byddwch chi'n meddwl bod cerdded yn gallu helpu eich ffitrwydd, cofiwch fod 30 munud o gerdded bob dydd yn help i'ch cadw i ffwrdd o'ch meddyg!

Er mwyn cael y manteision iechyd gorau, dylech anelu at gerdded yn gyflym am 30 munud bob dydd. Os yw hynny'n ormod, cerddwch yn gyflym am 10 munud dair gwaith y dydd. Dyna beth rydych chi'n anelu amdano. Gall hyn ymddangos yn ddychrynllyd, felly rydyn ni wedi meddwl am ffordd i'ch helpu i gyrraedd y nod yma. Mae cerdded yn gyflym yn golygu cerdded ar gyflymder sy'n gwneud i chi deimlo'n gynnes ac sy'n eich achosi i anadlu'n drymach nag arfer. Ond peidiwch â'i gorwneud hi. Fe ddylech chi fod yn gallu siarad wrth i chi gerdded!

Ymarfer corff

• Wythnos 1 - Ewch i gerdded am 10 munud ddwywaith y dydd, a gwnewch hynny dair gwaith yr wythnos.
• Wythnos 2 - Ewch i gerdded am 12 munud ddwywaith y dydd, a gwnewch hynny bedair gwaith yr wythnos.
• Wythnos 3 - Gwnewch yr un ymarfer ag wythnos 2.
• Wythnos 4 - Ewch i gerdded am 15 munud ddwywaith y dydd, a gwnewch hynny bedair gwaith yr wythnos.
• Wythnos 5 - Gwnewch yr un ymarfer ag wythnos 4, ond ceisiwch ddod o hyd i allt neu cerddwch ychydig yn gyflymach.
• Wythnos 6 - Dilynwch yr un patrwm ag wythnos 5, ond ceisiwch gerdded ar hyd llwybrau hirach neu anoddach a heriwch eich hunan nes i chi gyrraedd wythnos 10.
• Wythnos 10 - Ewch i gerdded am 30 munud bob dydd.
• Wythnos 11 - Llongyfarchiadau! Rydych chi wedi llwyddo!

Nawr, mae'r cyfrifoldeb yn eich dwylo chi. Heriwch eich hunan yn barhaus. Cofiwch, os byddwch chi'n cael trafferth yn ystod unrhyw un o'r ymarferion uchod, stopiwch. Ewch yn ôl i'r wythnos flaenorol a pheidiwch â symud ymlaen nes eich bod yn hyderus y gallwch chi gwblhau'r ymarferiad.

Nodwch: Os ydych chi wedi bod yn sâl yn ddiweddar, yn cymryd meddyginiaethau neu dros eich pwysau, dylech siarad â'ch meddyg cyn dechrau gwneud ymarfer corff.